Мемлекет басшысы 5 сәуірде жер қатынастары саласындағы мемлекеттік қызметтерді цифрландыру мәселелері бойынша заңнамалық актілерге түзетулер енгізуге қол қойды. Заңда Республикалық маңызы бар қалалар, астана, облыстық және аудандық маңызы бар қалалар шегінде жер учаскелерін электрондық форматта беру рәсімін оңайлату көзделген. Бұл туралы ҚР АШМ баспасөз қызметі хабарлайды.

Заңнамаға енгізілген өзгерістер жер учаскелеріне құқық берудің қолданыстағы мерзімдерін 30 жұмыс күніне дейін өзгертуге мүмкіндік береді. Атап айтқанда, аталған қалаларда жер комиссиясының институты алынып тасталады, сондай-ақ бірқатар құжаттар қысқартылады (жер комиссиясының хаттамалық шешімі, жерге орналастыру жобасы).

Кенттердің, ауылдардың және ауылдық округтердің жерлері үшін ауыл шаруашылығы мақсатындағы жерлерді толық цифрландырғанға дейін жер учаскелерін берудің қолданыстағы тәртібі сақталады.

Бұдан басқа, заң мемлекеттік органдарда және өзге де ұйымдарда құжаттарды келісу барысына онлайн мониторинг енгізеді, сондай-ақ жер учаскесіне құқық белгілейтін және сәйкестендіру құжаттарын тіркеу бойынша композиттік қызмет енгізіледі.

Жер учаскелерін электрондық беру рәсімі ҚР цифрлық даму және аэроғарыш өнеркәсібі министрлігі әзірлеген жылжымайтын мүліктің бірыңғай мемлекеттік кадастрының ақпараттық жүйесінің "Жария кадастрлық картасында" жер учаскесін таңдау арқылы жергілікті атқарушы органдардың геопорталдарында (Өңірлік геоақпараттық жүйелер) іске асырылатын болады. Жария кадастрлық карта Қазақстанның жер, құқықтық және қала құрылысы кадастрларының мәліметтерін және мемлекеттік органдардың өзге де мәліметтерін көрсететін болады.

Нормативтік құқықтық актілерді қабылдау қажеттілігіне байланысты заң 2023 жылғы 1 шілдеден бастап қолданысқа енгізілетін болады.